Ministri i Mbrojtjes, Ermal Nufi, zhvilloi një vizitë zyrtare në Divizionin e Anijeve Detare të kompanisë italiane Fincantieri në Muggiano. Ky aktivitet u zhvillua në kuadër të partneritetit strategjik mes Shqipërisë dhe gjigantit italian të industrisë detare, menjëherë pas nënshkrimit të statutit për krijimin e shoqërisë së përbashkët Fincantieri Albania në Gjenovë.
Gjatë qëndrimit në një prej qendrave më të rëndësishme evropiane për ndërtimin e anijeve ushtarake dhe sistemeve detare, ministri Nufi u njoh nga afër me proceset e projektimit, prodhimit dhe integrimit të platformave moderne detare. Pjesë e agjendës ishte edhe vëzhgimi i standardeve të avancuara në organizimin e një kantieri të integruar, menaxhimin industrial dhe protokollet e kontrollit të cilësisë.
Sipas ministrit Nufi, kjo vizitë shërben si një mundësi për shkëmbimin e përvojave, me synim zhvillimin e kapaciteteve industriale në Shqipëri. Ky proces vlerësohet si kyç për zbatimin e projektit të përbashkët në Vlorë, i cili synon të sjellë standarde ndërkombëtare në industrinë detare shqiptare. Shoqëria e re e themeluar do të mbikëqyrë gjithashtu modernizimin dhe menaxhimin e kantierit detar të Pashalimanit.