Ministria e Shëndetësisë dhe Mirëqenies Sociale ka hapur thirrjen për aplikim për mjekë dhe infermierë, për angazhim në qendrat shëndetësore të zonave turistike gjatë sezonit veror 2026. Kjo nismë vjen në kuadër të përgatitjeve për sezonin turistik dhe synon forcimin e kapaciteteve të shërbimit shëndetësor në zonat me fluks të lartë vizitorësh.
Aplikimet pranohen nga 20 prilli 2026 deri më 27 prill 2026, në oraret 08:00-16:30, pranë Drejtorisë së Operatorit të Shërbimeve të Kujdesit Shëndetësor. Aplikantët duhet të dorëzojnë formularin e aplikimit, jetëshkrimin, kopjen e dokumentit të identifikimit, diplomën dhe licencën profesionale. Librezën e punës dhe dokumente të tjera mund t'i bashkëngjisin si opsionale.
Sipas ministrisë, kjo masë garanton mbulim të plotë shëndetësor për qytetarët dhe turistët, duke mbështetur profesionistët në ofrimin e shërbimeve cilësore në terren.