Ministria e Shëndetësisë dhe Mirëqenies Sociale ka ndryshuar procedurat e punësimit, emërimit, pezullimit dhe disiplinës për mjekët në institucionet shëndetësore publike. Udhëzimi nr. 398/1, i nënshkruar nga ministrja Klodiana Spahiu, është botuar në Fletoren Zyrtare dhe ka hyrë menjëherë në fuqi.
Për mjekët specialistë dhe stomatologët, afati i aplikimit në platformën elektronike nuk mund të jetë më i shkurtër se 7 ditë kalendarike nga data e shpalljes së vendit vakant. Mjekët e përgjithshëm dhe mjekët e familjes mund të aplikojnë vazhdimisht.
Si rregull, kandidatët që janë të punësuar në një institucion shëndetësor publik nuk mund të aplikojnë ose të marrin pjesë në konkurrim përmes platformës. Përjashtim bëjnë mjekët specialistë të punësuar në institucione publike shëndetësore, të cilët nuk kanë kontratë me ministrinë: ata mund të aplikojnë për vende të lira në spitalet rajonale ose bashkiake.
Komisionet dhe vlerësimi
Për vendet e mjekëve specialistë në spitalet rajonale, bashkiake e ditore, si dhe në njësitë vendore të kujdesit shëndetësor dhe qendrat shëndetësore, komisionet do të ngrihen nga Drejtoria Qendrore e Operatorit të Shërbimeve të Kujdesit Shëndetësor (DQOSHKSH). Ato do të kenë tre anëtarë: një përfaqësues të DQOSHKSH-së, drejtorin rajonal ose përfaqësuesin e tij dhe drejtuesin ose një mjek të institucionit ku ndodhet vendi vakant.
Për mjekët e përgjithshëm dhe të familjes do të ngrihen komisione rajonale, përbërja e të cilave duhet të ndryshohet periodikisht, të paktën një herë në vit. Për spitalet universitare e terciare dhe institucionet qendrore në varësi të ministrisë, komisionet do të ngrihen nga drejtuesit përkatës dhe do të përfshijnë një përfaqësues të ministrisë.
Njësitë e burimeve njerëzore do të verifikojnë dokumentet, do të administrojnë dosjet dhe ankesat, si dhe do të njoftojnë kandidatët e kualifikuar dhe të pakualifikuar. Njoftimi për skualifikimin duhet të shpjegojë qartë arsyet. Sekretariatet teknike do t’ia përcjellin komisionit ankesat dhe do të njoftojnë vendimet përfundimtare, si dhe renditjen e kandidatëve sipas pikëve të marra në secilën fazë.
Pezullimi nga detyra
Udhëzimi përcakton se procedura, kohëzgjatja dhe pasojat financiare të pezullimit do të rregullohen sipas legjislacionit në fuqi për marrëdhënien e punës dhe ushtrimin e profesionit të mjekut.