Ministrja e Shëndetësisë dhe Mirëqenies Sociale, prof. Evis Sala, zhvilloi një takim me anëtarët e Këshillit Kombëtar të Personave me Aftësi të Kufizuar. Në qendër të diskutimeve u vendosën Ligji i ri për Aksesueshmërinë dhe Plani Kombëtar i Veprimit 2026–2030, dy dokumente me qasje ndërsektoriale, të harmonizuara me standardet e BE-së. Këto synojnë përmirësimin e cilësisë së jetës dhe garantimin e të drejtave për personat me aftësi të kufizuara.
Gjatë fjalës së saj, Evis Sala theksoi se mbështetja dhe fuqizimi i kësaj kategorie mbetet prioritet i Qeverisë Shqiptare. Ajo buron jo vetëm nga detyrimet institucionale, por edhe nga bindja se barazia dhe dinjiteti njerëzor janë themeli i një shoqërie demokratike e gjithëpërfshirëse.
Ministrja vlerësoi rolin e Këshillit Kombëtar si mekanizëm të rëndësishëm dialogu për politika të drejta, gjithëpërfshirëse dhe të zbatueshme. Ajo përsëriti parimin: askush të mos mbetet pas.
Sa i përket Ligjit të ri për Aksesueshmërinë, Sala deklaroi se ai nuk është thjesht një akt normativ, por angazhim politik për barazi reale në akses ndaj shërbimeve, infrastrukturës, teknologjisë dhe jetës publike. Ligji vendos standarde të qarta, përgjegjësi dhe mekanizma monitorimi. Suksesi i tij kërkon bashkëpunim nga pushteti vendor, institucionet qendrore, biznesi dhe shoqëria civile.
Në lidhje me Planin Kombëtar të Veprimit 2026–2030, ministrja e cilësoi atë si hap të rëndësishëm drejt ushtrimit real të të drejtave në jetën e përditshme. Plani fokusohet në jetesën e pavarur, përfshirjen në arsim, punësim, drejtësi dhe vendimmarrje politike. Ajo u ndal edhe te përfshirja politike e personave me aftësi të kufizuara.