Ministrja e Shëndetësisë dhe Mirëqenies Sociale, Evis Sala, gjatë inspektimit në Qendrën Multifunksionale në Vorë më 9 maj, zhvilloi një bashkëbisedim me të rinjtë në kuadër të aktivitetit “Rini në lëvizje – fuqia për të ndikuar”. Në këtë qendër, 25 të rinj janë angazhuar në programet e saj, duke kryer shërbime dhe punë vullnetare në mbështetje të komunitetit lokal.
Sala vlerësoi bashkëpunimin ndërmjet qeverisë, pushtetit vendor dhe partnerëve ndërkombëtarë, i cili ka mundësuar krijimin e hapësirave për shërbime të integruara sociale përmes mekanizmit të Fondit Social. “Është një shembull i shkëlqyer i bashkëpunimit ndërmjet qeverisë, pushtetit lokal dhe sigurisht institucioneve ndërkombëtare që na ndihmojnë vazhdimisht nëpërmjet mekanizmit të Fondit Social. Është një fakt që nëpërmjet vullnetarizmit siç e shohim këtu, por edhe këtij bashkëpunimi shumë të fortë, kanë marrë ndihmë rreth 47 mijë persona dhe janë ofruar **98 shërbime”, tha ajo.
Duke theksuar rëndësinë e angazhimit vullnetar, ministrja Sala deklaroi se ky model duhet të zgjerohet në të gjithë Shqipërinë. Ajo përgëzoi të rinjtë për kontributin e tyre dhe i inkurajoi për të vazhduar këtë angazhim si vlerë qytetare dhe humane në shërbim të komunitetit. “Këtë model duhet ta zgjerojmë më tej nëpër të gjithë Shqipërinë. Ndihma që jepni njerëzve që kanë nevojë është një ndihmë sublime, e pazëvendësueshme. Unë flas dhe nga ana e profesionit, duke qenë se jam mjeke dhe jam më tepër e lidhur me humanizmin ndaj pacientëve. Por kjo gjë që po bëni është shumë e bukur. Vazhdoni ta bëni sepse shoqëria ka nevojë, Shqipëria ka nevojë për këtë energji, për këtë kreativitet, por edhe për këtë qasje pozitive ndaj njëri-tjetrit dhe ndaj shoqërisë shqiptare”, nënvizoi ministrja.
Aktiviteti “Rini në lëvizje – fuqia për të ndikuar” realizohet në bashkëpunim ndërmjet Ministrisë së Shëndetësisë dhe Mirëqenies Sociale, Bashkisë Vorë dhe organizatave lokale të shoqërisë civile.