Më 25 shkurt, në mjediset e Fakultetit të Historisë dhe Filologjisë u zhvillua aktiviteti “Gjuha shqipe si politikë shtetërore: standardizimi dhe certifikimi në diasporë”, organizim i Qendrës së Botimeve për Diasporën. Morën pjesë ministrja e Arsimit Mirela Kumbaro, rektori i Universitetit të Tiranës Artan Hoxha, profesorë e akademikë.
Gjatë aktivitetit, Mirela Kumbaro njoftoi hyrjen në një fazë të re të kësaj qendre, që garanton mësimin e gjuhës shqipe në mënyrë të qëndrueshme, të standardizuar dhe certifikuar. Qendra parashikohet të shërbejë si institucion referencë për ngritjen e Agjencisë Kombëtare për Gjuhën Shqipe në Diasporë, strukturë që do të sigurojë vazhdimësinë, cilësinë dhe harmonizimin e politikave arsimore për gjuhën shqipe jashtë vendit, në bashkëpunim me universitetet dhe institucionet kërkimore.
Sipas të dhënave, janë regjistruar 326 shkolla/kurse ku mësohet shqip, rreth 850 mësues të gjuhës shqipe si dhe rreth 25 000 nxënës që ndjekin mësimin aktualisht. Potenciali total në diasporë arrin 270 mijë fëmijë nga mosha 5-14 vjeç dhe 424 mijë nga mosha 5-19 vjeç, pjesa më e madhe e të cilëve mbetet ende e pashfrytëzuar.
Ministrja Kumbaro theksoi se qendra, pas unifikimit të kurrikulave dhe teksteve, trajnimit të mësuesve, zhvillimit të programeve dhe integrimit të elementeve të dygjuhësisë si dhe mësimit përmes kulturës, kalon në këtë fazë të re për përmirësimin e rrugëtimit arsimor të nxënësve shqiptarë përmes gjuhës amtare. Ajo saktësoi se është përgatitur një kalendar pune për hapat e ardhshëm.