Ministrja e Shëndetësisë dhe Mirëqenies Sociale, prof. Evis Sala, u takua në Romë me përfaqësues të Agjencisë Italiane të Barnave (AIFA). Takimi synoi bashkëpunimin midis Shqipërisë dhe Italisë për përmirësimin e kuadrit ligjor farmaceutik dhe përafrimin e sistemit shqiptar me praktikat më të mira evropiane.
Ministrja Sala u ndal te hapat për përmirësimin e aksesit të qytetarëve në barna të sigurta, cilësore dhe të përballueshme, në përputhje me standardet evropiane. Kjo ndodh në kontekstin e përparimit të Shqipërisë drejt integrimit evropian dhe përafrimit të legjislacionit me acquis-in e Bashkimit Evropian për barnat dhe produktet farmaceutike.
Modernizimi i kuadrit ligjor dhe rregullator është domosdoshmëri për përmbushjen e detyrimeve të integrimit dhe garantimin e sigurisë së pacientëve. U diskutua krijimi i një modeli të qëndrueshëm të tregut farmaceutik, që mbron interesin publik dhe atraktivitetin për operatorë e industri. U evidentua rëndësia e reformës në çmimin dhe furnizimin e barnave, si dhe masat për forcimin e sistemit.
Një vëmendje e veçantë iu kushtua bashkëpunimit institucional përmes një Memorandumi Mirëkuptimi, në fazë diskutimi. Ky do të krijojë bazë për shkëmbim përvoje, asistencë teknike dhe forcim kapacitetesh në fusha si:
- forcimi i kapaciteteve në vlerësimin e teknologjive shëndetësore (HTA);
- mbështetja në inspektimet GMP dhe standardet e cilësisë;
- forcimi i farmacovigjilencës dhe shkëmbimi i informacionit për sigurinë e barnave;
- bashkëpunimi në politikat rregullatore, autorizimin e barnave dhe kontrollin e cilësisë.
Palët ndanë bindjen për rëndësinë e këtij bashkëpunimi.