Ministria e Industrisë, Ndërmarrësisë, Tregtisë dhe Inovacionit (MINTI), përmes Inspektoratit Qendror të Mbikëqyrjes së Tregut (IQMT), ka intensifikuar kontrollet për mbikëqyrjen e zbatimit të legjislacionit në fushën e të drejtës së autorit dhe të drejtave të përafërta. Në kuadër të këtij aksioni, ekipet inspektuese kanë zhvilluar sot inspektime në subjekte ekonomike të vendosura në rajonet e Prishtinës dhe Gjilanit.
Fokusi kryesor i këtyre inspektimeve janë bizneset që ushtrojnë veprimtari në fushën e fotokopjimit, riprodhimit dhe shpërndarjes së materialeve të mbrojtura me të drejtë autori. Sipas njoftimit zyrtar, qëllimi i këtyre masave është verifikimi i respektimit të kërkesave ligjore, si dhe parandalimi i shfrytëzimit apo riprodhimit të paautorizuar të veprave.
Veprimtaritë inspektuese po zbatohen në bazë të Ligjit Nr. 08/L-205 për të Drejtën e Autorit dhe të Drejtat e Përafërta, si dhe në kuadër të kompetencave të përcaktuara me Ligjin Nr. 08/L-279 për Inspektoratin Qendror të Mbikëqyrjes së Tregut. Institucionet synojnë përmes kësaj nisme mbrojtjen e autorëve dhe titullarëve të të drejtave, rritjen e ndërgjegjësimit ndër operatorët ekonomikë dhe krijimin e një tregu të rregulluar ligjërisht.
Nga MINTI dhe IQMT njoftojnë se aksionet e mbikëqyrjes do të vazhdojnë edhe në rajone të tjera të Kosovës. Planifikimi i kontrolleve të ardhshme do të mbështetet, përveç planit operativ, edhe në ankesat dhe informacionet e përcjella nga konsumatorët lidhur me rastet e dyshuara të piraterisë dhe shkeljes së të drejtave të autorit.