Prokuroria Themelore në Mitrovicë, Departamenti i Përgjithshëm, ka kërkuar nga Gjykata Themelore në Mitrovicë caktimin e masës së paraburgimit ndaj tre të pandehurve, të identifikuar si Habib Kalludra, Afrim Geci dhe Erion Geci. Ata dyshohen se kanë organizuar një skemë për manipulimin e testeve teorike për patentë-shofer, duke shfrytëzuar mjete teknologjike për të përcjellë përgjigjet e sakta tek kandidatët në këmbim të pagesave.
Sipas hetimeve, më 6 shkurt 2026, në objektin e Stacionit të Autobusëve në Mitrovicë, Habib Kalludra, në cilësinë e instruktorit të një autoshkolle, dhe Afrim Geci, ish-instruktor, dyshohet se kanë pranuar shuma të panjohura parash për të mundësuar kalimin e testit për kandidatet K.K. dhe A.D., duke u montuar pajisje me kamerë dhe dëgjuese.
Një rast tjetër dyshohet se ka ndodhur më 31 gusht 2026, ku Habib Kalludra dhe Erion Geci, në bashkëpunim me njëri-tjetrin, dyshohet se kanë siguruar pajisje të ngjashme për kandidatët Arizona Rushiti dhe Florent Zeneli. Sipas Prokurorisë, kandidatët ishin pajisur me:
• Një këmishë të zezë me pajisje elektronike dhe kufje për Arizona Rushitin.
• Një jelek të zi me pajisje elektronike dhe kufje për Florent Zenelin.
Operacioni policor lidhur me këtë rast ka rezultuar me sekuestrimin e pajisjeve të komunikimit dhe katër telefonave celularë. Gjykata Themelore në Mitrovicë pritet të mbajë seancën për shqyrtimin e kërkesës së prokurorisë për caktimin e paraburgimit ndaj të dyshuarve. Personat e përfshirë në këtë çështje gëzojnë prezumimin e pafajësisë deri në një vendim përfundimtar nga organet e drejtësisë.