Prokuroria Themelore në Pejë, Departamenti për Krime të Rënda, ka ngritur aktakuzë kundër 12 të pandehurve për kryerjen e veprave penale "Keqpërdorim i pozitës zyrtare apo autoriteti zyrtar", "Manipulimi me prova", "Legalizimi i përmbajtjes së rreme" dhe "Dhënie ryshfeti". Ata dyshohen se kanë mundësuar pajisje të kundërligjshme me patentë shoferi të kandidatëve të auto-shkollave në Pejë.
Aktakuza, e cila përmban 391 faqe, është ngritur nga prokurori i çështjes. Të pandehurit janë:
- A.Sh.
- T.Sh.
- R.S.
- M.S.
- L.G.
- N.D.
- B.K.
- D.T.
- B.B.
- M.D.
- M.I.
- F.B.
Sipas aktakuzës, A.Sh., në cilësinë e koordinatorit të Njësisë së Qendrës për Patentë Shoferë në Pejë, nga viti 2021 deri më 23 korrik 2024, nuk i ka përmbushur detyrat zyrtare. Ai nuk ka zbatuar Ligjin për Patentë Shofer dhe udhëzimet administrative për organizimin e provimeve. Dyshohet se ka planifikuar dhe organizuar provime teorike në data dhe rrethana të kundërligjshme, duke mundësuar testimin e kandidatëve që nuk figuronin në listat zyrtare dhe pa koordinim me Ministrinë kompetente.
R.S. dyshohet se ka ndihmuar duke ndërmjetësuar dhënien e ryshfeteve nga përfaqësues të auto-shkollave, në shuma nga 300 deri në 1000 euro, për kalimin e testeve teorike dhe praktike.
Aktakuza përfshin edhe dyshimin për A.Sh., T.Sh. dhe R.S. se më 17 nëntor 2023, në zyrën e koordinatorit të Njësisë së Qendrës për Patentë Shoferë në Pejë, kanë kryer në bashkëkryerje veprën e "Manipulimit me prova". T.Sh., si pyetëse e pjesës teorike, dyshohet se ka ndihmuar kandidatë gjatë viteve 2021-2024.