Një mjek i kujdesit paliativ është dënuar me burgim të përjetshëm nga gjykata e Berlinit, pasi u shpall fajtor për vrasjen e 12 grave dhe 3 burrave. Krimet u kryen në periudhën midis shtatorit të vitit 2021 dhe korrikut të vitit 2024. Ndonëse viktimat, të moshave nga 25 deri në 94 vjeç, vuanin nga sëmundje të rënda, hetimet konfirmuan se asnjëri prej tyre nuk ndodhej në fazën terminale të jetës.
Sipas prokurorisë, mjeku i identifikuar si Johannes M. administronte ilaçe me efekt vdekjeprurës pa dijeninë dhe pëlqimin e pacientëve gjatë vizitave në banesat e tyre. Në disa raste, i dënuari dyshohet se tentoi të fshihte provat duke u vënë zjarrin banesave të viktimave. Një nga ngjarjet më të rënda u regjistrua në korrik të vitit 2024, kur mjeku vrau dy pacientë brenda së njëjtës ditë në Berlin.
Pas një procesi gjyqësor që zgjati rreth një vit, gjatë të cilit mjeku fillimisht mbajti qëndrim mohues, ai pranoi vrasjen e 12 pacientëve muajin e kaluar, duke kërkuar falje dhe duke pretenduar se veprimet e tij kishin si qëllim dhënien fund të vuajtjeve të të sëmurëve. Përveç dënimit me burgim, gjykata vendosi ndalimin e përhershëm të ushtrimit të profesionit të mjekut dhe masa shtesë sigurie.
Autoritetet gjermane po vijojnë hetimet për 76 raste të tjera që mund të kenë lidhje me të njëjtin person. Nëse këto dyshime vërtetohen, rasti do të klasifikohet si një ndër vrasjet më të mëdha seriale në historinë e Gjermanisë.
Përditësime
Gjatë seancës gjyqësore në Berlin, mjeku i dënuar me burgim të përjetshëm pranoi vrasjen e dy pacientëve, një 75-vjeçari dhe një 76-vjeçareje, në korrik të vitit 2024. Sipas prokurorisë, pas kryerjes së krimeve, i akuzuari tentoi t'i vinte flakën banesës së gruas, por pa sukses. Para trupit gjykues, ai deklaroi se veproi për t'i kursyer viktimat nga "vuajtjet dhe dobësitë", duke konfirmuar gjithashtu bashkëpunimin e tij të plotë në procedurat e mëtejshme gjyqësore.
Gjykata në Berlin ka vendosur masën e paraburgimit parandalues (Sicherungsverwahrung) për mjekun e dënuar me burgim të përjetshëm. Kjo masë siguron mbikëqyrjen e vazhdueshme të të dënuarit pas përfundimit të dënimit, për shkak të rrezikshmërisë së lartë që ai paraqet për shoqërinë.