Sulmuesi 34-vjeçar, Mohamed Salah, ndodhet shumë pranë transferimit te skuadra turke e Trabzonsporit, pasi palët kanë avancuar ndjeshëm në negociatat për të ardhmen e tij. Sipas gazetarit turk Yagiz Sabuncuoglu, marrëveshja mes palëve është arritur dhe kanë mbetur vetëm detajet përfundimtare përpara zyrtarizimit të transferimit.
Oferta e klubit turk, ku luan edhe futbollisti shqiptar Ernest Muçi, përfshin një kontratë dyvjeçare me një përfitim financiar prej rreth 17 milionë eurosh. Një element kyç i marrëveshjes është përfshirja e një klauzole speciale, përmes së cilës Salah do të marrë 20% të të ardhurave nga shitja e produkteve që mbajnë markën e tij. Ky kusht ishte raportuar më herët si shkaku kryesor i dështimit të bisedimeve me Besiktasin.
Sipas informacioneve të bëra publike, Mohamed Salah pritet të mbërrijë në Stamboll të mërkurën në orën 12:00 për të kryer hapat e fundit të transferimit. Ndërkohë, mediat turke si Fanatik e kishin cilësuar më herët situatën si një garë të hapur, ndërsa interesim ka pasur edhe nga klube të Arabisë Saudite.
Nëse ky transferim finalizohet, Trabzonspori do të bëhet klubi i shtatë në karrierën e egjiptianit pas përvojave të tij në Arab Contractors, Basel, Fiorentina, Roma, Chelsea dhe Liverpool. Aktualisht, pas mbylljes së ciklit te Liverpooli, Salah ndodhet në statusin e lojtarit të lirë.