Pas përfundimit të aventurës 9-vjeçare te Liverpool, ku regjistroi 442 ndeshje, 257 gola dhe 123 asistime, e ardhmja e Mohamed Salah është kthyer në qendër të vëmendjes së merkatos. Trabzonspor ka bërë një lëvizje konkrete për të siguruar shërbimet e futbollistit, duke paraqitur një ofertë prej 17 milionë eurosh në sezon, financim i siguruar përmes sponsorëve, për një marrëveshje 2-vjeçare.
Dueli mes klubeve turke
Kjo ofertë e Trabzonsporit ka ndryshuar rrjedhën e ngjarjeve për Beşiktaş, klub i cili më herët kishte arritur një marrëveshje verbale me përfaqësuesit e lojtarit. Oferta e Beşiktaş parashikonte një kontratë 1+1-vjeçare me një pagë neto prej 10 milionë eurosh në sezon dhe 2 milionë euro bonuse. Pas avancimit të bisedimeve mes agjentit të Salah dhe drejtuesve të Trabzonsporit, Beşiktaş ka vendosur të pezullojë zyrtarisht negociatat deri në një njoftim të dytë.
Ambiciet e Trabzonsporit
Sipas gazetarit Yağız Sabuncuoğlu, palët janë pranë arritjes së një akordi të plotë. Për Trabzonsporin, ku aktivizohet edhe futbollisti shqiptar Ernest Muçi, afrimi i mundshëm i Salah shihet si një mundësi për të forcuar repartin ofensiv dhe për të sfiduar dominimin katërvjeçar të Galatasaray në kampionatin turk. Mohamed Salah konsiderohet si një nga lojtarët më të mëdhenj të të gjitha kohërave, pasi me Liverpool fitoi dy tituj të kampionit të Anglisë dhe trofeun e Ligës së Kampionëve.
Përditësime
Gara për transferimin e Mohamed Salah është intensifikuar, pasi Al Hilal, Al Ittihad dhe Al Qadsiah i janë shtuar listës së klubeve saudite të interesuara. Agjenti i lojtarit, Ramy Abbas Issa, theksoi se e ardhmja e egjiptianit mbetet e pasigurt dhe nuk është marrë ende një vendim përfundimtar. Ndërkohë, përkundër raportimeve të mëparshme për një tërheqje të mundshme, drejtori sportiv i Beşiktaş, Önder Özen, konfirmoi se klubi turk ka një ofertë zyrtare në tryezë dhe vijon negociatat. Paralelisht, edhe Trabzonspor ka dorëzuar një ofertë zyrtare për futbollistin.
Mohamed Salah ka pranuar ofertën zyrtare të Trabzonsporit. Sipas raportimeve, marrëveshja parashikon një kontratë 2-vjeçare për sulmuesin 34-vjeçar, nga e cila ai pritet të përfitojë 17 milionë euro në vit, përfshirë bonuset e performancës.