Shqipëria po përballet me një tranzicion demografik të shpejtë, duke u shndërruar nga një vend me popullsi ndër më të rejat në Europë në një shoqëri me moshë mediane të barabartë me mesataren e Bashkimit Europian. Sipas statistikave të fundit të INSTAT, mosha mediane në Shqipëri ka arritur në 45 vjeç në 1 janar 2026, duke tejkaluar nivelin e BE-së, ku në 1 janar 2025 treguesi ishte 44.9 vjeç.
Nga viti 2014 deri në fillim të vitit 2026, mosha mediane në Shqipëri është rritur me 10.8 vite, ndërsa në BE ky tregues është rritur me 2.4 vite. Ky ritëm tregon se Shqipëria është plakur 4.5 herë më shpejt se vendet e Bashkimit Europian gjatë dekadës së fundit. Nëse në BE plakja ka ndjekur një trajektore lineare me një rritje mesatare prej 2 muajsh në vit, në Shqipëri ky trend ka qenë më intensiv, me një mesatare prej 6 muajsh në vit.
Trendi i plakjes është përshpejtuar ndjeshëm në dy vitet e fundit:
- Në vitin 2024, mosha mediane ishte 43.4 vjeç.
- Në vitin 2025, ajo u rrit në 44.3 vjeç.
- Në vitin 2026, shifra arriti vlerën rekord prej 45.0 vjeç.
Ekspertët dhe të dhënat zyrtare e lidhin këtë fenomen me dy faktorë kryesorë: normën e ulët të lindshmërisë dhe largimin e vazhdueshëm të popullsisë në moshë riprodhuese dhe punëtore. Largimi i forcës vitale të punës ka sjellë një ndryshim në strukturën e popullsisë, duke bërë që gjysma e shqiptarëve të jenë tashmë mbi 45 vjeç.
Përditësime
Popullsia e Shqipërisë u plak me 7 muaj gjatë vitit 2026, duke shënuar një rritje të ndjeshme të moshës mediane krahasuar me vitin 2025. Ky tregues, që ndan popullsinë në dy grupe të barabarta prej 50%, është krahasuar me statistikat e fundit të Bashkimit Europian për vitin 2025, në mungesë të të dhënave të përditësuara nga BE për vitin aktual.