Zyrtarë të Ministrisë së Punëve të Brendshme (MPB) zhvilluan një vizitë pune në Komunën e Mitrovicës së Veriut, me qëllim monitorimin nga afër të procesit të pranimit të kërkesave për leje qëndrimi dhe regjistrimin e fakteve të gjendjes civile.
Në vizitë morën pjesë përfaqësues nga ARC-ja, Departamenti Ligjor dhe Departamenti për Shtetësi, Azil dhe Migracion. Ata monitoruan punën e zyrtarëve lokalë në trajtimin e kërkesave dhe ofrimin e shërbimeve për qytetarët.
Gjatë qëndrimit, zyrtarët zhvilluan takime të drejtpërdrejta me qytetarë të interesuar për rregullimin e statusit të tyre juridik në Republikën e Kosovës. Qytetarët u njoftuan për procedurat ligjore dhe mundësitë për pajisje me dokumente zyrtare.
Ndër çështjet kryesore të ngritura nga qytetarët përfshihen:
- pajisja me dokumente të bashkëshortëve të shtetasve të Kosovës përmes bashkimit familjar;
- regjistrimi i fëmijëve të lindur jashtë vendit;
- procedurat për leje qëndrimi të familjarëve të personave që tashmë posedojnë leje qëndrimi.
MPB-ja thekson përkushtimin për ofrimin e shërbimeve të qasshme dhe transparente për të gjithë qytetarët, duke siguruar zbatim të njëtrajtshëm të legjislacionit në të gjithë territorin e vendit. Kjo vizitë është pjesë e angazhimeve të vazhdueshme për informimin e qytetarëve dhe lehtësimin e procedurave administrative. Vizita të ngjashme pritet të realizohen edhe në komunat e tjera të Kosovës.