Një ngjarje e rëndë ka ndodhur në qendër të qytetit të Perugias, ku një muzikant 55-vjeçar me origjinë nga Siçilia ka humbur jetën brenda një dhome hoteli. Personi që e shoqëronte është gjetur në gjendje të rëndë shëndetësore dhe është dërguar menjëherë për trajtim të specializuar mjekësor.
Sipas hetimeve paraprake të Karabinierëve italianë, pista kryesore e hetimit është helmimi aksidental nga monoksidi i karbonit. Autoritetet po përqendrojnë verifikimet në një ambient shërbimi që ndodhet ngjitur me dhomën e viktimës, ku është i instaluar një sistem kaldaje. Ekspertët po hetojnë nëse një defekt teknik ose një rrjedhje gazi nga ky impiant ka shkaktuar tragjedinë.
Alarmi për këtë ngjarje u ngrit kur kolegët e grupit muzikor vunë re mungesën e tyre në koncertin e planifikuar në Sala dei Notari. Dyshja pritej të performonte aty përkrah rreth 40 muzikantëve të tjerë, por mosparaqitja e tyre ngriti dyshime te organizatorët. Pas kontrollit në ambientet e hotelit, u zbulua gjendja tragjike e tyre. Ekipet hetimore vijojnë punën për të zbardhur plotësisht shkaqet dhe rrethanat e këtij incidenti.