NASA filloi zhvendosjen e raketës së saj hënore Artemis II dhe anijen kozmike Orion drejt platformës së lëshimit në Qendrën Hapësinore Kennedy. Udhëtimi i ngadaltë, që zgjat orë të tëra, nis testet përfundimtare përpara misionit të parë hënor me ekuipazh në më shumë se 50 vjet.
Ky hap është thelbësor, pasi nis fazën e fundit të detyrave praktike në platformë. Ekipet lidhin mjetin me sistemet tokësore dhe kryejnë ushtrime numërimi mbrapsht. Raketa dhe kapsula prej 11 milionë paundësh janë montuar në një platformë të lëvizshme lëshimi.
NASA ka caktuar 6 shkurtin si datën më të hershme të lëshimit për Artemis II. Misioni shënon lëshimin e parë me ekuipazh duke përdorur raketën e Sistemit të Lëshimit Hapësinor (SLS). Astronautët do të udhëtojnë në kapsulën Orion për një udhëtim afërsisht 10-ditor, që përfshin një xhiro rreth Hënës me trajektore "kthimi të lirë" para kthimit në Tokë.
Qëllimi kryesor është të vërë në provë sistemet e mbështetjes së jetës, udhëzimit dhe mekanizmat e tjerë kritikë, në përgatitje të misionit të ardhshëm që parashikon uljen e astronautëve në sipërfaqen hënore.
Ekuipazhi përfshin astronautët e NASA-s Reid Wiseman, Victor Glover dhe Christina Koch, si dhe Nancy Hansen, e cila pritet të jetë kanadezja e parë në një mision eksplorimi të Hënës, si specialist i misionit.
Në një konferencë për shtyp, kryetari i menaxhimit të misionit Artemis II, John Honeycutt, theksoi se "siguria e ekuipazhit do të jetë përparësia numër 1". Ai vuri në dukje se afati kohor varet nga testet e ardhshme në platformë.
NASA paralajmëron se data e lëshimit mund të ndryshojë për shkak të motit ose problemeve teknike. Agjencia ka vendosur kufizime të rrepta në lidhje me vetëtimat, erën dhe temperaturën.