Prokuroria Themelore në Prishtinë, Departamenti i Përgjithshëm, në bashkëpunim me Policinë e Kosovës, ka ndaluar personin me inicialet XH.V. për një periudhë 48 orësh. Ai dyshohet se ka kryer veprën penale “Vjedhje e rëndë”, sipas nenit 315 të Kodit Penal të Republikës së Kosovës.
Sipas dyshimeve fillestare, në argjendarinë “G…..” në Prishtinë janë vjedhur rreth 9 kilogramë ari, në vlerë prej 1 milion euro.
Gjatë bastisjes në banesën e të dyshuarit u gjet dhe u sekuestrua një armë pa leje, si dhe një diamant, me urdhër të prokurorit të shtetit.
Ndaj pasurisë së të pandehurit do të lëshohet urdhër i përkohshëm ndalimi. Kjo pasuri përfshin një veturë të tipit BMW X6 dhe një banesë në lagjen Tophane, në vlerë rreth 110.000 euro. Prokuroria do të parashtrojë kërkesa për urdhër ndalues përfundimtar.
Prokurori i shtetit, brenda afatit ligjor, do të paraqesë në gjykatën kompetente kërkesë për caktimin e masës së paraburgimit ndaj të pandehurit.