Seanca e shqyrtimit fillestar në rastin penal ndaj 21 të pandehurve, të akuzuar për përfshirje në Masakrën e Reçakut, është ndërprerë përkohësisht në Gjykatën Themelore në Prishtinë për arsye procedurale. Kryetarja e trupit gjykues, Violeta Namani-Hajra, konstatoi se disa avokatë nuk ishin pajisur me shkresat e lëndës, ndërsa mungonin edhe mbrojtësit ligjorë për katër prej të akuzuarve.
Prokurori special, Ilir Morina, bëri të ditur se Prokuroria ka kërkuar listën e avokatëve të caktuar sipas detyrës zyrtare nga Oda e Avokatëve të Kosovës. Deri më tani, vetëm 10 avokatë janë paraqitur për t'u pajisur me materialet e nevojshme, ndërsa të tjerët janë ftuar të veprojnë njësoj pas përfundimit të seancës.
Sipas aktakuzës së ngritur nga Prokuroria Speciale e Republikës së Kosovës më 30 dhjetor 2025, të pandehurit – ish-pjesëtarë të Ushtrisë së ish-Jugosllavisë (Brigada 243 e Mekanizuar, Korpusi i Prishtinës) dhe Ministrisë së Punëve të Brendshme (MUP) – akuzohen për krime të luftës kundër popullsisë civile. Gjatë periudhës 1998-1999, ata ngarkohen për trajtim çnjerëzor, shkatërrim të pasurisë, dëbim masiv, spastrim etnik dhe vrasjen e 42 civilëve më 15 janar 1999.
Duke qenë se të pandehurit janë të paarritshëm për organet e drejtësisë, gjykimi po zhvillohet në mungesë. Gjykata ende nuk ka njoftuar datën për vazhdimin e seancës pas ndërprerjes së sotme.