Në kuadër të ndeshjes miqësore të futbollit ndërmjet Shqipërisë dhe Izraelit, Policia e Shtetit, në bashkëpunim me Policinë Bashkiake të Tiranës, ka ndërmarrë një plan masash për garantimin e rendit dhe sigurisë.
Kufizimet në qarkullim
Nga ora 16:00 deri në përfundim të ndeshjes, do të aplikohen kufizime të qarkullimit të automjeteve në këto akse rrugore:
• Bulevardi “Dëshmorët e Kombit”, nga fast food “Laguna” pranë urës së ish-hotel Dajtit;
• Rruga “Papa Gjon Pali II”, te kryqëzimi i RTSH-së;
• Rruga “Dervish Hima” dhe rruga “Asim Zeneli”, pranë ambasadës së SHBA-së;
• Rruga “Themistokli Gërmenji”;
• Rruga “Ismail Qemali”, te kryqëzimi i RTSH-së;
• Rruga “Lekë Dukagjini”, pranë ish-Gardës së Republikës (hyrje e kufizuar për mjetet e autorizuara nga FSHF);
• Rruga “Abdyl Frashëri”, pranë kryqëzimit të Librit Universitar;
• Te sheshi “Willson”, ku do të devijohet lëvizja drejt rrugës “Sami Frashëri” para përfundimit të ndeshjes.
Akset si Rruga e Elbasanit, Unaza dhe bulevardi “Bajram Curri” do të mbeten të lira për qarkullimin e automjeteve.
Masat për tifozët
Policia do të ushtrojë kontrolle të imtësishme në hyrjet e stadiumit për të parandaluar hyrjen e sendeve të ndaluara, si:
• Banderola me përmbajtje raciste;
• Fishekzjarrë, flakadanë dhe lëndë piroteknike;
• Sende të forta, monedha metalike, çadra, çakmakë, karikues celularësh dhe produkte kozmetike.
Autoritetet u kërkojnë tifozëve të paraqiten në stadium duke nisur nga ora 18:00, për të shmangur vonesat për shkak të fluksit të pritur pranë hyrjeve.
Përditësime
Policia e Shtetit ka angazhuar qindra efektivë për garantimin e rendit gjatë ndeshjes Shqipëri-Izrael. Autoritetet po asistojnë tifozët dhe po ofrojnë udhëzime për mbarëvajtjen e aktivitetit.