Policia e Tiranës ka marrë masa për garantimin e rendit dhe sigurisë para, gjatë dhe pas ndeshjes së futbollit ndërmjet ekipeve Partizani dhe KF Tirana, e cila zhvillohet sot në orën 16:30 në stadiumin "Arena Kombëtare".
Segmentet rrugore të bllokuara nga ora 14:00 deri në përfundim të aktivitetit përfshijnë:
• Sheshi “Nënë Tereza”
• Rruga “Lekë Dukagjini”
• Rruga “Dervish Hima”
• Zonat përreth stadiumit “Air Albania”.
Itineraret e tifozëve
Lëvizja e tifozëve të Partizanit nis nga zona e Inxhinierisë, në rrugën “21 Dhjetori”, më pas tek “Libri Universitar”, anash Presidencës, në rrugën “Gjergj Filipi”, tek “Coin”, për t’u drejtuar tribunës N.
Lëvizja e tifozëve të KF Tiranës nis nga Sheshi “Skënderbej”, tek ish-Hotel “Dajti”, Ura e Dajtit, kthim tek ETC-ja, në rrugën e Elbasanit, rruga “Dervish Hima”, më pas drejt rrugës “Sheh Ahmet Pazari”, “Ambasador 3”, për hyrjet V–S.
Policia siguron lëvizjen përgjatë këtyre itinerareve dhe nuk lejon grumbullime apo kalime jashtë tyre.
Kontrollet në hyrje
Do të ushtrohen kontrolle rigoroze për sende të kundërligjshme, si:
• Sende të forta
• Bidonë uji
• Çadra
• Çelësa metalikë
• Lëndë piroteknike.
Çdo tifoz duhet të ketë dokument identifikimi. Nuk lejohet hyrja:
• Pa dokument identifikimi.
• E fëmijëve nën 16 vjeç, edhe nëse janë të pajisur me biletë, pa prind ose kujdestar ligjor të shoqëruar me dokument.
• E tifozëve të identifikuar më parë si problematikë në aktivitete sportive.
Policia kërkon mirëkuptimin e tifozerive për zbatimin e këtyre masave.