Në kuadër të ndeshjes së futbollit ndërmjet Shqipërisë dhe San Marinos, që do të zhvillohet sot në orën 20:45 në stadiumin Air Albania, Policia e Shtetit në bashkëpunim me Policinë Bashkiake të Tiranës ka ndërmarrë një plan masash për garantimin e rendit dhe sigurisë. Duke filluar nga ora 17:00 e deri në përfundim të ndeshjes, do të aplikohen kufizime të qarkullimit në disa akse rrugore pranë stadiumit.
Rrugët e bllokuara
Kufizimet përfshijnë akset e mëposhtme:
• Bulevardi “Dëshmorët e Kombit”, nga fast food-i “Laguna” pranë urës së ish-Hotel Dajtit;
• Rruga “Papa Gjon Pali II”, te kryqëzimi i RTSH-së;
• Rruga “Dervish Hima” dhe rruga “Asim Zeneli”, pranë Ambasadës së SHBA-së;
• Rruga “Themistokli Gërmenji” (në hyrje) dhe rruga “Ismail Qemali” (te kryqëzimi i RTSH-së);
• Rruga “Lekë Dukagjini”, pranë ish-Gardës së Republikës (vetëm për mjetet e autorizuara nga FSHF-ja);
• Rruga “Abdyl Frashëri”, pranë kryqëzimit të Librit Universitar;
• Te sheshi “Willson”, ku do të devijohet lëvizja në drejtim të rrugës “Sami Frashëri” pak para përfundimit të ndeshjes.
Ndërkohë, Rruga e Elbasanit, Unaza dhe bulevardi “Bajram Curri” mbeten të lira për qarkullim.
Kontrollet ndaj tifozëve
Autoritetet kanë njoftuar se tifozët do t'i nënshtrohen kontrolleve të imtësishme për të parandaluar hyrjen me sende të ndaluara si: banderola me përmbajtje raciste, fishekzjarrë, flakadanë, lëndë piroteknike, monedha metalike, çadra, çakmakë, karikues celularësh, mjete kozmetike dhe sende të forta të rrezikshme.
Policia e Shtetit u bën thirrje tifozëve të paraqiten në hyrjet e stadiumit duke filluar nga ora 18:30, pasi fluksi i lartë mund të sjellë vonesa dhe humbjen e mundësisë për të hyrë në stadium në kohë. Qindra punonjës policie do të jenë në terren për të ofruar ndihmë dhe për të siguruar mbarëvajtjen e aktivitetit pa incidente.