Për garantimin e rendit dhe sigurisë gjatë ndeshjes miqësore midis Shqipërisë dhe Luksemburgut, Policia e Shtetit në bashkëpunim me Policinë Bashkiake të Tiranës ka njoftuar kufizime të përkohshme të qarkullimit të mjeteve. Këto masa janë në fuqi nga ora 17:00 deri në përfundim të takimit.
Akset rrugore që do të jenë të bllokuara përfshijnë:
• Bulevardi “Dëshmorët e Kombit”, nga hoteli “Rogner” në drejtim të sheshit “Nënë Tereza”;
• Rruga “Papa Gjon Pali II”, te kryqëzimi i RTSH-së;
• Rruga “Dervish Hima”, pranë Ambasadës së SHBA-së;
• Rruga “Asim Zeneli”, pranë Ambasadës së SHBA-së;
• Rruga “Themistokli Gërmenji”, në fillim të rrugës;
• Rruga “Ismail Qemali”, te kryqëzimi i RTSH-së;
• Rruga “Lekë Dukagjini”, pranë ish-Gardës së Republikës, korridor hyrës për në parkimin e mjeteve të autorizuara nga FSHF-ja;
• Rruga “Abdyl Frashëri”, pranë kryqëzimit të Librit Universitar;
• Sheshi “Wilson”, ku lëvizja do të devijohet në drejtim të rrugës “Sami Frashëri”, pak para përfundimit të ndeshjes.
Rruga e Elbasanit, Unaza dhe bulevardi “Bajram Curri” do të mbeten të lira për qarkullimin e mjeteve. Policia ka theksuar se do të ushtrohen kontrolle të imtësishme ndaj tifozëve për të parandaluar futjen e sendeve të ndaluara, si banderola me përmbajtje raciste, fishekzjarrë, flakadanë, lëndë piroteknike, monedha metalike, çadra, çakmakë, karikues telefonash, mjete dhe produkte kozmetike, si dhe sende të tjera të forta që rrezikojnë sigurinë e pjesëmarrësve.
Përditësime
Policia e Shtetit ka ngushtuar perimetrin e bllokimit në bulevardin kryesor për ndeshjen Shqipëri-Luksemburg, krahasuar me masat e rrepta të zbatuara gjatë përballjes me Izraelin. Ky ndryshim synon balancimin e sigurisë së ndeshjes me lirinë e lëvizjes në Tiranë, në një kohë kur forcat e rendit janë të angazhuara edhe në menaxhimin e protestave kundër projektit të resortit në Zvërnec.