Drejtoria Vendore e Policisë Elbasan ka marrë masa për garantimin e rendit dhe sigurisë para, gjatë dhe pas ndeshjes së futbollit ndërmjet AF Elbasani dhe Vllaznia. Ndeshja zhvillohet sot, më 27 prill 2026, në orën 19:00, në stadiumin Elbasan Arena.
Gjatë këtij aktiviteti do të bllokohet qarkullimi i automjeteve në perimetrin përreth stadiumit. Qarkullimi lejohet vetëm për mjetet e pajisura me autorizim të posaçëm, ku shënohen targat e automjeteve.
Policia do të sigurojë lëvizjen e tifozëve përgjatë itinerareve të caktuara dhe nuk do të lejojë grumbullime apo kalime jashtë tyre.
Para hyrjes në stadium do të ushtrohen kontrolle ndaj tifozëve për sende të kundërligjshme, si:
- sende të forta;
- bidonë uji;
- çadra;
- çelësa metalikë;
- lëndë piroteknike.
Çdo tifoz duhet të ketë dokument identifikimi. Nuk lejohet hyrja e shtetasve pa të. Fëmijët e mitur hyjnë vetëm me prindin ose kujdestarin ligjor të shoqëruar me dokument identifikimi.
Nuk lejohet hyrja e tifozëve të identifikuar më parë nga policia si problematikë në aktivitete sportive.
Policia kërkon mirëkuptimin e tifozerive dhe qytetarëve për zbatimin e këtyre masave dhe shmangien e lëvizjes me automjete në segmentet e bllokuara.