Qeveria shqiptare ka miratuar ndryshime në ligjin "Për ndryshimet klimatike", të cilat janë publikuar në Fletoren Zyrtare dhe do të hyjnë në fuqi në fund të janarit, sipas burimeve mediatike.
Këto ndryshime synojnë rishikimin e kuadrit kombëtar për klimën dhe forcimin e masave të përshtatjes ndaj ndryshimeve klimatike. Dokumentet kryesore që përcaktohen përfshijnë Strategjinë Kombëtare Afatgjatë për Ndryshimet Klimatike dhe Zhvillimin me Emetim të Ulët, Plani Kombëtar për Përshtatjen ndaj Ndryshimeve Klimatike (NAP), si dhe Plani Kombëtar për Energjinë dhe Klimën.
Ministria përgjegjëse, në bashkëpunim me ministrinë e energjisë, përmes një grupi ndërministror, do të monitorojë dhe vlerësojë çdo dy vjet progresin e zbatimit të Planit Kombëtar për Energjinë dhe Klimën.
Ligji parashikon afate specifike për rishikimin e strategjive dhe planeve kombëtare:
• Strategjia Kombëtare Afatgjatë rishikohet të paktën çdo 10 vjet;
• Plani i Veprimit Afatgjatë për Zhvillimin me Emetim të Ulët dhe Plani Kombëtar për Përshtatjen (NAP) rishikohen çdo 5 vjet;
• Plani Kombëtar për Energjinë dhe Klimën rishikohet çdo 10 vjet.
Një nen i ri i shtuar në ligj trajton përshtatjen ndaj ndryshimeve klimatike, duke përfshirë forcimin e kërkimit shkencor, përmirësimin e sistemeve të të dhënave dhe paralajmërimit të hershëm, ngritjen e kapaciteteve institucionale, si dhe sigurimin e fondeve të posaçme për financimin e masave të nevojshme. Këto masa synojnë të integrojnë politikat dhe kuadrin ligjor për të adresuar sfidat klimatike në mënyrë të koordinuar.