Në seancën e rigjykimit të zhvilluar në Gjykatën Themelore në Prishtinë – Departamenti Special, prokurorja speciale Fikrije Fejzullahu ndryshoi aktakuzën ndaj Arlind Manxhukës, Egzon Azemit, Qerim Elshanit dhe Edi Zenelajt.
Të akuzuarit Manxhuka dhe Azemi, zyrtarë të Lëvizjes Vetëvendosje, ngarkohen me veprën penale "Nxitja e përçarjes dhe mosdurimit" sipas nenit 141, paragrafi 1, duke hequr paragrafin 2 dhe pjesën për cilësinë e personave zyrtarë. Elshani dhe Zenelaj akuzohen për "Kanosje", paragrafi 1, duke zëvendësuar paragrafin 3. Ata dyshohet se kanë kanosur me dashje gjykatësin Mentor Bajraktari dhe ish-prokurorin special Afrim Shefkiu.
Gjatë seancës, Azemi, Manxhuka dhe Zenelaj u mbrojtën në heshtje, duke qëndruar pranë deklaratave të dhëna në gjykimin e mëparshëm. Elshani u shpreh i gatshëm për përgjigje, por nuk pati pyetje nga avokati i tij Muharrem Kurtaj, prokurorja Fejzullahu apo trupi gjykues.
Nuk u paraqitën propozime për plotësim provash. Në fjalën përfundimtare, prokurorja Fejzullahu vlerësoi se provat e administruara vërtetojnë pa mëdyshje kryerjen e veprave penale dhe kërkoi shpalljen fajtorë të të akuzuarve, si dhe caktimin e dënimit sipas dispozitave ligjore.
Pas ndryshimit të aktakuzës, të gjithë të akuzuarit deklaruan se janë të pafajshëm. Gjykata Themelore në Prishtinë kishte liruar më herët Arlind Manxhukën nga akuzat në aktgjykimin e 7 marsit 2025.
Përditësime
Egzon Azemi mungoi në seancën gjyqësore të 07.04.2026. Gjyqtari Kushtrim Shyti konstatoi mungesën. Gjykata vendosi lëshimin e urdhërarrestit për Azemin dhe shtyu seancën për orën 13:15. Avokatja Teuta Xhema konfirmoi komunikimin me Azemin, ndërsa KALLXO.com nuk arriti ta kontaktonte.