Në Gjykatën Themelore në Prishtinë ka dështuar mbajtja e seancës dëgjimore ndaj këngëtarit Besart Kelmendi, i njohur si Gjesti, për shkak të mungesës së tij. Mbrojtësi i tij, avokati Burim Azemi, deklaroi se këngëtari e kishte njoftuar përmes një mesazhi për pamundësinë e pjesëmarrjes, duke sqaruar se ai ndodhej në Shqipëri për një koncert.
Në seancë mungoi gjithashtu përfaqësuesi i palës së dëmtuar, Erkand Shabani, avokati Besnik Berisha, ndërsa prokurori Malart Kuçi ishte i pranishëm. Përballë kësaj situate, gjykatësja Edita Canta konstatoi mungesën e kushteve ligjore për vijimin e shqyrtimit dhe paralajmëroi se, nëse i akuzuari nuk paraqitet në seancën e ardhshme, gjykata do të lëshojë urdhëresë për sjellje me detyrim.
Këngëtari Besart Kelmendi përballet me akuzat për tri vepra penale: “Armëmbajtje pa leje”, “Kanosje” dhe “Asgjësim apo dëmtim i pasurisë”. Sipas pretendimeve, ngjarja ka ndodhur në mars të vitit 2026 në zyrat e studios “Onima” në Prishtinë, si pasojë e një mosmarrëveshjeje për borxh.
Ndryshe, Prokuroria Themelore në Prishtinë kishte njoftuar më 19 mars 2026 se i pandehuri kishte arritur marrëveshje për pranimin e fajësisë me prokurorin e shtetit, veprim ky që kishte çuar në ndërprerjen e masës së paraburgimit ndaj tij.
Përditësime
Seanca gjyqësore ndaj këngëtarit Besart Kelmendi, i njohur si Gjesti, ka dështuar për shkak të mungesës së tij. Avokati mbrojtës, Burim Azemi, deklaroi se nuk ka informacion nëse mungesa është e justifikuar. Ndërkaq, zëdhënësja e Prokurorisë Themelore, Kaltrina Shala, konfirmoi se marrëveshja për pranimin e fajësisë ka shërbyer si bazë ligjore për ndërprerjen e masës së paraburgimit ndaj Kelmendit.