Gjatë seancës së mbajtur më 28 gusht 2026 pranë Gjykatës Themelore në Prishtinë, prokurori Avni Namani njoftoi ndryshimin e dispozitivit të aktakuzës ndaj ministrit në detyrë të Punëve të Brendshme, Xhelal Sveçla. Sipas akuzës së ndryshuar, Sveçla akuzohet për veprën penale “Përdorimi i armës apo mjetit të rrezikshëm” nga neni 375, paragrafi 2 i Kodit Penal të vitit 2012. Prokuroria hoqi dorë nga ndjekja penale për veprën “Pengimi i personit zyrtar në kryerjen e detyrave zyrtare”, pasi për këtë vepër ka arritur parashkrimi absolut.
Prokurori Namani kërkoi shpalljen fajtor të të akuzuarit, duke argumentuar se bombola e gazit lotsjellës, bazuar në raporte të ekspertizës, konsiderohet armë. Në aktakuzën e re thuhet se më 21 mars 2018, gjatë seancës së jashtëzakonshme në Kuvend, i akuzuari ka përdorur gaz lotsjellës pa paralajmërim, duke detyruar deputetët të largohen nga salla.
Nga ana tjetër, mbrojtja e përfaqësuar nga avokati Luar Prenaj kërkoi aktgjykim lirues. Avokati pretendoi se nuk është provuar kryerja e veprës penale dhe theksoi se ekziston mospërputhje mes ekspertizës dhe provës materiale të përdorur në gjyq. Vetë Xhelal Sveçla deklaroi se veprimet e tij në vitin 2018 kishin karakter politik, me qëllim kundërshtimin e marrëveshjes së demarkacionit me Malin e Zi, të cilën ai e konsideroi të dëmshme për Kosovën.
Në këtë proces gjyqësor, fillimisht të bashkëngjitur, akuzohen edhe Fitore Pacolli-Dalipi, Salih Zyba dhe Drita Millaku, mirëpo procedura për Sveçlën është veçuar për shkak të mungesës së tij në seancën e 16 janarit 2026. Gjykata njoftoi se shpallja e aktgjykimit për këtë çështje do të bëhet më 2 shtator 2026 në orën 09:00.
Përditësime
Prokurori Avni Namani paraqiti sot si provë materiale një CD, e cila sipas Prokurorisë, shfaq momentin e aktivizimit dhe hedhjes së bombolës së gazit nga Xhelal Sveçla. Organi i akuzës prezantoi gjithashtu fotoalbumin e policisë me 18 dëshmi të tjera materiale, kryesisht bombola gazi. Mbrojtja kundërshtoi provat, duke argumentuar se ekspertiza nuk përputhet me veprimet e pretenduara dhe se deputetët nuk shfaqën simptomat e përshkruara në aktakuzë. Nga ana e tij, Sveçla deklaroi se veprimet e tij kishin për qëllim mbrojtjen e një territori që tashmë nuk është më pjesë e Kosovës. Gjyqtari Sabit Sadikaj konfirmoi zyrtarisht përfundimin e shqyrtimit gjyqësor.