Ministri i Punëve të Brendshme, Xhelal Sveçla, ka dalë para Gjykatës Themelore në Prishtinë në seancën për rastin e hedhjes së gazit lotsjellës në Kuvendin e Kosovës në mars 2018.
Gjatë deklarimit, Sveçla tha se "nuk e ndiej veten fajtor". Ai shpjegoi se "akti ynë ka qenë një akt tërësisht politik, me qëllim jo të pengojmë personat në kryerjen e detyrës zyrtare, por të parandalojmë faljen ose shitjen e hektarëve tokë të Republikës së Kosovës".
Gjykata ka vendosur ta ndajë procedurën penale ndaj Sveçlës nga ajo e të pandehurve të tjerë në këtë rast.
Gjyqtari Sabit Sadikaj njoftoi se të pandehurit Fitore Pacolli Dalipi dhe Salih Zyba kanë njoftuar gjykatën për mungesën e tyre. Për të pandehurën Drita Millaku, gjyqtari tha se nuk ka dëshmi se ajo e ka pranuar ftesën.
Për tre të pandehurit do të lëshohet ftesë dhe urdhëresë për sjellje me detyrim.