Policia e Fierit arrestoi në qytetin e Fierit shtetasin E. F., 23 vjeç, i cili ishte shpallur në kërkim ndërkombëtar nga autoritetet italiane.
Specialistët për Hetimin e Narkotikëve të Drejtorisë Vendore të Policisë Fier organizuan dhe finalizuan operacionin e koduar “Gjurmimi”, bazuar në informacionet e siguruara nga bashkëpunimi me partnerët italianë. Ky operacion rezultoi me kapjen dhe arrestimin provizor të të dyshuarit me qëllim ekstradimin në Itali.
Gjykata e Riminit në Itali, në vitin 2025, i kishte caktuar masën e sigurisë “arrest në burg” shtetasit E. F. për veprat penale “pjesëmarrja në organizatë kriminale” dhe “trafikimi i lëndëve narkotike”. Ai dyshohet si pjesëtar i një organizate kriminale që merrej me trafikimin e kokainës dhe lëndëve të tjera narkotike.
Përditësime
Interpol Tirana vazhdon bashkëpunimin me Interpol Roma për përfundimin e procedurave të ekstradimit të 23-vjeçarit të arrestuar në Fier.
Gjykata e Riminit urdhëroi më 27 gusht 2025 arrestimin e Emiseldo Faskos (23 vjeç – i cili kishte dalë së fundmi nga burgu), Kledis Shermadhit (24 vjeç) dhe Ardit Mehdit (29 vjeç).