Mesfushori ofensiv Nedim Bajrami ndodhet në fazën përmbyllëse të negociatave për t'u larguar nga Rangers dhe për t'iu bashkuar skuadrës saudite Al-Taawoun. Lojtari, i cili iu bashkua klubit skocez në vitin 2024 nga Sassuolo, nuk bënte pjesë në formacionin e ekipit për ndeshjen e parë të sezonit kundër Dundee United, duke konfirmuar mungesën e hapësirave për të në skuadrën skoceze.
Raportimet për natyrën e kësaj lëvizjeje ndryshojnë mes burimeve. Disa media bëjnë me dije se bëhet fjalë për një huazim që do të zgjasë deri në përfundim të edicionit 2026/27, ndërsa burime të tjera raportojnë për një transferim të plotë me vlerë rreth 3 milionë euro, shoqëruar me një kontratë që do ta mbajë lojtarin në Arabinë Saudite deri në vitin 2029. Sipas gazetarit italian Nico Schira, kontrata e ofruar për futbollistin parashikon një përfitim prej 3 milionë eurosh në sezon.
Gjatë periudhës së tij në Skoci, Bajrami nuk gjeti hapësirat e duhura, duke u aktivizuar për vetëm 519 minuta në të gjitha garat gjatë sezonit të kaluar. Pavarësisht kontratës që e lidh me Rangers deri në verën e vitit 2028, palët janë dakordësuar për t'i dhënë fund bashkëpunimit pas dy vitesh, duke i hapur rrugë mesfushorit të Kombëtares shqiptare për të vazhduar karrierën në elitën e futbollit saudit.