Në Maqedoninë e Veriut është nënshkruar marrëveshja për projektimin dhe ndërtimin e interkonektorit të gazit që do të lidhë vendin me Serbinë. Kontrata është firmosur nga drejtori i kompanisë shtetërore NOMAGAS, Nedim Rama, dhe drejtori i kompanisë ndërtuese Rapid Bild, Toni Karanfillovski. Ceremonia u zhvillua në prani të kryeministrit Hristijan Mickoski dhe ministres së Energjisë, Sanja Bozhinovska.
Sipas marrëveshjes, e cila bazohet në modelin FIDIC si kontratë "çelës në dorë", segmenti i tubacionit në territorin e Maqedonisë së Veriut do të ketë një gjatësi prej 22.4 kilometrash dhe një diametër prej 500 milimetrash. Pika fillestare është përcaktuar pranë bllok-stacionit "Kleçevc", ndërsa pika përfundimtare do të jetë në kufirin me Serbinë, pranë fshatit Sopot. Projekti përfshin gjithashtu ndërtimin e pesë objekteve shoqëruese: stacionit kryesor matës, stacionit reduktues, bllok-stacionit dhe dy stacioneve për pranimin dhe dërgimin e pajisjeve të pastrimit. Kapaciteti teknik i planifikuar është deri në 160 mijë metra kub gaz në orë, me mundësi rrjedhjeje në të dyja drejtimet.
Kryeministri Hristijan Mickoski vlerësoi se realizimi i këtij investimi, në bashkëpunim me ndërtimin e interkonektorit me Greqinë, do t'i mundësojë vendit një lidhje energjetike vertikale përgjatë Korridorit 10. Sipas kreut të qeverisë, interkonektori me Greqinë pritet të përfundojë në gjysmën e parë të vitit 2027, ndërsa lidhja me Serbinë parashikohet të jetë gati në fund të vitit 2028.
Përditësime
Drejtori i NOMAGAS, Nedim Rama, konfirmoi se kostoja totale e investimit arrin në 29,4 milionë euro. Ky projekt, sipas Ramës, e transformon Maqedoninë e Veriut në një vend tranzit dhe pikë strategjike në hartën energjetike të rajonit. Kryeministri Hristijan Mickoski e lidhi këtë zhvillim me vizionin strategjik për ta kthyer shtetin në udhëkryq të Korridoreve 8 dhe 10, duke u bazuar në integrimin e infrastrukturës rrugore, hekurudhore dhe energjetike.