Nëntogëri Endi Sherifi nga Forca e Sigurisë së Kosovës (FSK) ka përfunduar me sukses kursin PCBC (Platoon Commander Battle Course), një nga trajnimet më sfiduese të këmbësorisë në Ushtrinë Britanike. Kursi u zhvillua në Brecon, Uells, në Mbretërinë e Bashkuar.
Gjatë këtij kursi intensiv, Sherifi demonstroi përkushtim të lartë, profesionalizëm dhe aftësi udhëheqëse të avancuara, duke u veçuar mes pjesëmarrësve ndërkombëtarë. Për performancën e tij, ai u nderua me Mirënjohje të Veçantë nga Komandanti i Shkollës së Këmbësorisë. Çmimin e dorëzoi Gjeneralmajor Carl Boswell, Shef i Shtabit të Forcave Tokësore britanike.
FSK e ka cilësuar këtë arritje si dëshmi të përkushtimit të pjesëtarëve të saj, të cilët përfaqësojnë Kosovën me dinjitet në arenën ndërkombëtare dhe ngrenë standardet profesionale të forcës.
Ambasada Britanike në Kosovë ka uruar nëntogërin Sherifi për vlerësimin e veçantë pas përfundimit të kursit PCBC, që fokusohet në përgatitjen e komandantëve të togave me aftësi taktike të larta, forcë fizike dhe mendore. Ambasada thekson krenarinë për mbështetjen ndaj zhvillimit të FSK-së si institucion sigurie profesional, multietnik dhe të përgjegjshëm demokratikisht.