Dy oficerët e Forcës së Sigurisë së Kosovës, major Afrim Xhelili dhe major Besnik Thaqi, kanë përfunduar me sukses të lartë Kursin e Avancuar të Komandës dhe Shtabit (ACSC) në Akademinë e Mbrojtjes në Shrivenham të Mbretërisë së Bashkuar. Krahas kualifikimit ushtarak, ata kanë përfituar edhe titullin akademik Master në Studimet e Mbrojtjes, dhënë nga King’s College në Londër.
Sipas njoftimit zyrtar të FSK-së, ky kurs synon edukimin dhe zhvillimin e udhëheqësve të nivelit të mesëm dhe të lartë për detyra komanduese dhe shtabore në nivel operacional dhe strategjik. Programi aftëson pjesëmarrësit për planifikimin e operacioneve ushtarake, bashkëpunimin me institucionet qeveritare dhe partnerët ndërkombëtarë, si dhe për përdorimin efektiv të instrumenteve të fuqisë kombëtare në funksion të paqes dhe sigurisë globale.
Në edicionin e këtij viti të kursit kanë marrë pjesë më shumë se 240 pjesëmarrës nga Britania e Madhe dhe 47 shtete të tjera nga e gjithë bota. FSK e ka vlerësuar këtë sukses si dëshmi të përkushtimit për ndërtimin e një ushtrie moderne, të përgatitur sipas standardeve më të larta ndërkombëtare.