Departamenti për Krime të Rënda pranë Prokurorisë Themelore në Pejë ka ngritur aktakuzë ndaj të pandehurit me inicialet I.Z., në lidhje me ngjarjen e ndodhur më 13 janar 2026, rreth orës 00:15. Sipas akuzës, i dyshuari ka hyrë në një lokal në komunën e Deçanit dhe ka hapur zjarr ndaj katër personave.
Hetimet kanë konfirmuar se motivi i sulmit ka qenë përkatësia kombëtare e të dëmtuarve. Nga të shtënat, tre persona kanë pësuar lëndime: dy prej tyre kanë marrë plagë të rënda trupore, ndërsa njëri lëndime të lehta. Personi i katërt ka arritur t'i shmanget sulmit pa pësuar lëndime fizike.
I pandehuri I.Z. akuzohet për kryerjen e dy veprave penale:
- "Vrasje e rëndë" e mbetur në tentativë
- "Mbajtja në pronësi, kontroll ose posedim të paautorizuar të armëve"
Pas arrestimit, autoritetet kanë zhvilluar kontroll dhe bastisje, gjatë të cilave është gjetur dhe sekuestruar arma e zjarrit dhe municioni i përdorur në këtë vepër penale. Prokurori i Shtetit i ka propozuar Gjykatës kompetente që, pas shqyrtimit gjyqësor dhe administrimit të provave, i pandehuri të shpallet fajtor dhe të dënohet konform dispozitave ligjore në fuqi.