Valjet Qosja, nipi i akademikut Rexhep Qosja, publikoi të enjten letrën e fundit që xhaxhai i tij i kishte lënë më 30 prill 2016 në Prishtinë. Letra, drejtuar atij, përmban udhëzimet për ceremoninë e varrosjes, pas ndarjes së Qosjes nga jeta në moshën 89-vjeçare më 23 prill 2026.
Në letër, Rexhep Qosja shkruan se dëshiron të varroset pa ritual fetar, sepse ka jetuar duke besuar në mendimin shkencor, ngritjen shpirtërore dhe përparimin shoqëror. Ai kërkon mungesë të çdo pranie zyrtare, për shkak të pikëpamjeve kritike ndaj sundimtarëve dhe pushteteve.
"Varrimin tim dua ta bëjnë vetëm familjarët e mi. Meqenëse jam kujdesur të jetoj thjesht, ashtu thjesht dua të jem edhe i varrosur: pa fjalime, pa medie, pa lule, afër varrit të gruas sime Shpresës. Vdes i qetë", thuhet në letër.
Qosja shton se jetën, krijimtarinë mendore dhe veprimtarinë politike ia ka kushtuar lirisë, bashkimit dhe mirëqenies demokratike të popullit shqiptar. "As Shqipërisë shtetërore e as Kosovës, të sotmes e ardhmërisë së tyre, nuk u kam mbetur borxh. Në qoftë se Kosova më ka mbetur borxh mua – këtë do të mund ta thonë historianët e ardhshëm të letërsisë, të kulturës e të mendimit politik shqiptar", shkruhet më tej.
Në fund, ai reflekton se nuk vdes pa mëkat, por pranon se mund të ketë pasur gjykime të ashpra në kushte të vrazhda politike e shoqërore. "Varrosjen e pres i bindur se kam jetuar, krijuar e vepruar duke bërë mirë, duke predikuar të mirën e duke përhapur njerëzillëkun. Këto mendime i shkrova duke qenë i vetëdijshëm dhe mendjeqartë", përfundon letra, e nënshkruar nga vetë Qosja.
Ceremonia e varrosjes u zhvillua sipas amanetit, vetëm me familjarët, pa media dhe pa zyrtarë.
Përditësime
Vilajet Rexhepi, nipi i akademikut Rexhep Qosja, publikoi tekstin e plotë të pjesës së adresuar në amanetin e tij të fundit: 'NIPIT TIM VALJETIT I CILI U KUJDES PËR JETËN TIME DHE PREJ TË CILIT KËRKOJ TË KUJDESET EDHE PËR VARROSJEN TIME'.
Qosja vdiq dy muaj para se të mbushte 90 vjeç.