Projekti për autostradën Kashar–Rrogozhinë ka hyrë në fazën përfundimtare përpara nisjes së punimeve. Ministri i Infrastrukturës dhe Energjisë, Enea Karakaçi, bëri të ditur se pas përmbylljes së detajeve teknike dhe lidhjes me bajpasin e Tiranës, Autoriteti Rrugor Shqiptar (ARRSH) ka miratuar projektin e zbatimit. Ky vendim u hap rrugë procedurave për shpronësimet e nevojshme, të cilat do të nisin menjëherë për të mundësuar fillimin e ndërtimit brenda vitit 2026.
Autostrada, me një gjatësi prej 33,5 kilometrash, do të jetë e kategorisë A dhe do të shërbejë si vazhdim i aksit Thumanë–Kashar, duke krijuar një lidhje të drejtpërdrejtë veri–jug. Projekti është dhënë me koncesion për një periudhë 35-vjeçare, me një vlerë investimi që arrin në 474,8 milionë euro pa TVSH. Pas përfundimit, autostrada do të jetë me pagesë për përdoruesit.
Ministri Karakaçi e cilësoi këtë ndërhyrje si një element strategjik për modernizimin e infrastrukturës rrugore shqiptare dhe integrimin në rrjetin europian të transportit. Ky segment do të ndihmojë në shkarkimin e trafikut në aksin aktual Tiranë–Durrës, i cili mbetet ndër më të ngarkuarit në vend.
Ndërtimi i Kashar–Rrogozhinë është pjesë e një pakete më të gjerë investimesh në infrastrukturën kombëtare, ku përfshihen gjithashtu:
• Bypassi i Tiranës
• Bypassi i Elbasanit
• Segmenti Elbasan–Rrogozhinë
• Segmenti Elbasan–Qafë Thanë
• Autostrada Milot–Balldren
Përditësime
Autoriteti Rrugor Shqiptar përshpejtoi afatet e ndërtimit të autostradës Kashar-Rrogozhinë, duke planifikuar nisjen e punimeve brenda vitit 2024 në vend të 2026-ës. Institucioni ka miratuar zyrtarisht projektin e zbatimit dhe ka aktivizuar procedurat e shpronësimit për pronat e prekura nga gjurma. Ekspertët përmbyllën gjithashtu diskutimet teknike për lidhjen e këtij aksi me Bypass-in e Tiranës, duke siguruar integrimin e plotë të projektit.