Nga data 1 janar 2026, tregu i sigurimeve në Shqipëri ka nisur zbatimin e sistemit bonus-malus në sigurimin e detyrueshëm të mjeteve motorike (TPL). Ky sistem diferencën primet e sigurimit bazuar në historikun e dëmeve të tre viteve të fundit, sipas Rregullores “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit”, të miratuar me Vendimin e Bordit të AMF nr. 156, datë 19 shtator 2024.
Sistemi parashikon bonus për drejtuesit pa dëme dhe malus për ata që kanë shkaktuar dëme. Sipas siguruesve, rreth 96% e drejtuesve do të përfitojnë bonus prej 3% në prim. Për një dëm të vetëm aplikohet koeficienti 1.18 (malus 18%), ndërsa për dy ose më shumë dëme koeficienti 1.39 (malus 39%).
Autoriteti i Mbikëqyrjes Financiare (AMF) ka ndërtuar sistemin për marrjen e të dhënave për dëmet në kohë reale nga kompanitë e sigurimit. Koeficientët u depozituan në AMF dhe u publikuan në faqet zyrtare të kompanive, bashkë me kalkulatorin e përllogaritjes dhe shembuj praktikë. Në dhjetor 2025, kompanitë zhvilluan trajnime për zbatimin dhe sqarimin ndaj klientëve.
Sipas Xhevdet Kopani, drejtor i përgjithshëm i Eurosig, sistemi është i drejtë dhe domosdoshëm, me efekte ndërgjegjësuese për respektimin e Kodit Rrugor dhe uljen e aksidenteve. Sapo futet targa dhe shasia e mjetit në sistem, kryhen përllogaritjet automatike.
Parimi bonus-malus parashikohej në Ligjin “Për sigurimin e detyrueshëm në sektorin e transportit” të vitit 2021, si e drejtë e kompanive, por jo detyrim. Rregullorja e AMF-së e bëri të detyrueshëm zbatimin nga viti 2026.