Një person ka humbur jetën si pasojë e një aksidenti trafiku në rrugën Komoran-Carralevë, rreth orës 19:30 të mbrëmjes së 15 janarit 2026.
Në aksident janë përfshirë dy automjete. Sipas zëdhënares së Policisë për rajonin e Prishtinës, Flora Ahmeti, si pasojë janë lënduar pesë persona, njëri prej të cilëve ka vdekur. Vdekja e viktimës mashkull është konstatuar nga ekipi mjekësor në Shtëpinë e Shëndetit në Komoran.
Katër personat e tjerë të lënduar janë dërguar për trajtim mjekësor në Qendrën Klinike Universitare të Kosovës (QKUK). Me rastin po merret njësiti rajonal i trafikut, i cili ka nisur hetimet për zbardhjen e rrethanave.
Deklarata e plotë e Flora Ahmetit:
"Sot rreth orës 19:30, kemi pranuar informacionin se në rrugën Komoran-Carralevë ka ndodhur një aksident trafiku me pasoja fatale. Në këtë aksident kanë qenë të përfshira dy automjete. Si pasojë e aksidentit janë lënduar pesë persona, njëri nga të cilët ka vdekur. Vdekja e viktimës (mashkull) është konstatuar nga ekipi mjekësor në Shtëpinë e Shëndetit në Komoran. Personat e tjerë të lënduar janë dërguar për trajtim mjekësor në QKUK, ndërkohë që me rastin po merret njësiti i trafikut rajonal."
Përditësime
Shoferi i dyshuar është i mitur dhe mbahet në mbajtje.
Trupi i viktimës dërgohet në IML për obduksion me urdhër të prokurorit për të mitur.
Katër të lënduarit janë meshkuj kosovarë.