Një aksident trafiku me pasoja fatale ka ndodhur mëngjesin e së mërkurës, rreth orës 09:00, në aksin rrugor Carralevë-Komoran. Në këtë ngjarje ka qenë i përfshirë një automjet, ndërsa drejtuesi i tij, një i mitur, nuk ka arritur t'u mbijetojë plagëve të marra.
Zëdhënësja e Policisë së Kosovës për rajonin e Prishtinës, Flora Ahmeti, ka konfirmuar se informata për aksidentin është pranuar në orët e mëngjesit. Sipas njoftimit zyrtar, vdekja e viktimës është konstatuar nga ekipi mjekësor në QKUK.
Aktualisht, Njësiti Rajonal i Trafikut po kryen hetimet për të zbardhur rrethanat dhe shkaqet që çuan deri te ky aksident.