Gjykata Themelore në Prishtinë – Dega në Lipjan, Departamenti i Përgjithshëm – Divizioni për Çështje Penale vendosi në lidhje me kërkesën e Prokurorisë Themelore në Prishtinë për masën e paraburgimit ndaj të pandehurve A.K. dhe V.P., prindërve të një 5-vjeçari në Lipjan. Vendimi lidhet me veprat penale shkelja e detyrimeve familjare dhe lëndimi i rëndë trupor.
Çifti akuzohet për mostrajtim të fëmijës, dhunë fizike dhe psiqike ndaj tij, si dhe lëndim të rëndë trupor. Fëmija u dërgua në QKUK në gjendje kritike shëndetësore dhe psikologjike si pasojë e dyshimeve për neglizhencë dhe keqtrajtim nga prindërit.
Gjyqtarja e procedurës paraprake, pas dëgjimit të palëve dhe analizimit të shkresave të lëndës, gjeti se kërkesa e prokurorisë ishte e bazuar. Ajo miratoi kërkesën dhe caktoi masën e paraburgimit në kohëzgjatje prej një muaji për secilin të pandehur.
Palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.