Gjykata Themelore në Prishtinë, Departamenti i Përgjithshëm, Divizioni për Çështje Penale, ka caktuar më 13 mars 2026 masën e paraburgimit prej një muaji ndaj Besart Kelmendit, të njohur me nofkën Gjesti.
Vendimi erdhi pas kërkesës së Prokurorisë Themelore në Prishtinë, e cila dyshon se i pandehuri ka kryer veprat penale kanosja, asgjësimi apo dëmtimi i pasurisë, si dhe mbajtja në pronësi, kontroll ose posedim të paautorizuar të armëve.
Gjyqtarja e procedurës paraprake, pas dëgjimit të palëve dhe shqyrtimit të shkresave të lëndës, vlerësoi kërkesën si të bazuar. Gjykata konstaton se ekzistojnë rrethana që tregojnë rrezikun e ikjes, mundësinë e ndikimit në dëshmitarë dhe rrezikun e përsëritjes së veprës penale.
Sipas njoftimit zyrtar, paraburgimi është masa adekuate dhe e vetmja që garanton rrjedhjen e papenguar të procedurës penale në këtë fazë.
Palët e pakënaqura kanë të drejtë të paraqesin ankesë në Gjykatën e Apelit, përmes Gjykatës Themelore në Prishtinë.