Një djalë 5-vjeçar është hospitalizuar në Klinikën e Pediatrisë në Prishtinë pas dyshimeve për dhunë dhe keqtrajtimi nga prindërit e tij. Ngjarja raportohet se ka ndodhur një ditë më parë, ndërsa policia ka ndaluar prindërit A.K. dhe V.P., të cilët dyshohen për veprat penale shkelja e detyrimeve familjare dhe lëndim i rëndë trupor.
Gjykata Themelore e Prishtinës, Dega në Lipjan, ka caktuar masën e paraburgimit për një muaj ndaj prindërve pas kërkesës së Prokurorisë Themelore në Prishtinë. Gjyqtarja e procedurës paraprake, pas dëgjimit të palëve dhe analizës së dosjes, konfirmoi se masa është e bazuar dhe miratoi kërkesën.
Fëmija u pranua në Qendrën Klinike Universitare në gjendje të rëndë dhe dyshohet se ka pësuar lëndime të rënda, përfshirë prerje në gishtat e këmbës. Klinika e Pediatrisë njofton se pacienti u nënshtrua ndërhyrjes kirurgjikale në nivel të shputave nga ekipet e Ortopedisë dhe Kirurgjisë Plastike. Gjatë operacionit, gjendja e tij ishte stabile dhe pas përfundimit u transferua në Kujdesin Intensiv Pediatrik për trajtim të mëtejshëm.
Spitali thekson se ofron përkujdesje maksimale sipas protokolleve mjekësore dhe se çdo përditësim do të jepet vetëm përmes Zyrës për Informim pranë SHSKUK-së. Lusin mediat të shmangin presionet për informata shtesë për shkak të ndjeshmërisë së rastit.