Klinika e Pediatrisë në Shërbimin Spitalor Klinik dhe Universitar të Kosovës (ShSKUK) njoftoi se ka përfunduar intervenimi kirurgjik ndaj një 5-vjeçari nga Janjeva e Lipjanit. Pacienti, i hospitalizuar në Kujdesin Intensiv Pediatrik, rrezikonte amputimin e shputave, pasi dyshohet se është keqtrajtuar nga prindërit.
Intervenimi u realizua sipas indikacioneve mjekësore nga ekipet specialistike të Ortopedisë dhe Kirurgjisë Plastike. Gjatë procedurës, gjendja e pacientit ka qenë stabile.
Pas operacionit, vogëlushi u transferua në Kujdesin Intensiv Pediatrik, ku po vazhdon trajtimin, mbikëqyrjen dhe përkujdesjen postoperatore. Ekipet mjekësore ofrojnë kujdes maksimal në përputhje me protokollet.
Për shkak të ndjeshmërisë së rastit, ky është informacioni aktual. Çdo përditësim i mëtejmë do të njoftohet vetëm përmes Zyrës për Informim pranë ShSKUK-së. Klinika i fton mediat të kenë mirëkuptim dhe të shmangin presionet për informata shtesë apo intervista.