Një fqinje e familjes në fshatin Janjevë të komunës Lipjan ka rrëfyer se prindërit A.K. dhe V.P. ushtronin dhunë fizike ndaj shtatë fëmijëve të tyre. Ngjarja lidhet me keqtrajtimin e një fëmije 5-vjeçar, i cili tani po mjekohet në Klinikën e Pediatrisë.
Banorja thotë se familja kishte probleme të shumta që nga 10 vjet më parë dhe ishte e njohur për organet e rendit. Ajo shton se fëmijën 5-vjeçar nuk e kishte parë kurrë duke ecur, pasi prindërit e mbajtën gjithmonë në krahë, madje edhe kur dilnin në shitore. "Kanë pasur probleme këta gjithë prej që jemi 10 vjet këtu… Edhe këtë fëmijë… veç në dorë e kanë mbajtur", ka thënë ajo.
Sipas fqinjes, britmat e fëmijëve dëgjoheshin shpesh natën, deri në orën 12 të natës, për shkak të rrahjeve nga prindërit. Fqinjtë nuk i kishin njoftuar organet e rendit nga frika se familja ishte e rrezikshme. "I ka rrahur gjithë… nuk kemi guxuar se janë të rrezikshëm", ka deklaruar banorja.
Fqinja tregon se shpesh i shihte fëmijët duke luajtur në rrugë. Punonjësit socialë të Qendrës për Punë Sociale në Lipjan vizitonin familjen rregullisht. Nënën e fëmijëve e vizitonin psikiatri çdo dy javë, duke i dhënë infuzione dhe barna të nevojshme. "Shumë janë ardhur shpesh, kanë ardhur edhe të psikiatrisë… ka ndodhur çdo dy javë", ka thënë fqinjeja, e cila vetë është rast social.