Togeri i Forcës së Sigurisë së Kosovës (FSK), Arijanit Elshani, ka përfunduar me sukses kursin e udhëheqjes për oficerët e Policisë Ushtarake (Military Police Basic Officer Leader Course), i cili është mbajtur në Shtetet e Bashkuara të Amerikës.
Sipas njoftimit zyrtar të FSK-së, gjatë këtij programi profesional, toger Elshani ka demonstruar njohuri të avancuara, aftësi të larta udhëheqëse dhe përkushtim në përmbushjen e standardeve ushtarake. Për shkak të performancës së dalluar, ai është shpërblyer me çmimet "Honor Graduate" dhe "Iron Man".
Këto çmime ndahen për oficerët që tregojnë rezultate të larta në fushën akademike, disiplinë të fortë dhe qëndrueshmëri fizike. Forca e Sigurisë së Kosovës ka theksuar se ky sukses është një tregues i profesionalizmit të lartë të personelit ushtarak kosovar në institucionet ndërkombëtare të mbrojtjes.