Një operacion kërkim-shpëtimi është duke u zhvilluar në malin e Çikës, pasi dy turistë nga Gjermania kanë dërguar një sinjal emergjence SOS. Ekipet e ndërhyrjes janë nisur drejt zonës së majës së Qorres, ku turistët rezultojnë të bllokuar për shkak të terrenit të vështirë.
Në aksion janë angazhuar forcat speciale Delta Force, shërbime të Policisë së Vlorës, punonjës të Administratës së Zonave të Mbrojtura (ADZM), si dhe një infermier. Sipas të dhënave paraprake, shkak për kërkimin e ndihmës dyshohet të jetë një lëndim fizik ose përkeqësim i gjendjes shëndetësore të njërit prej turistëve gjatë lëvizjes në zonën malore.
Deri në këto momente, nuk ka ende një njoftim zyrtar lidhur me gjendjen e saktë shëndetësore të personave të bllokuar apo përfundimin e operacionit. Autoritetet po punojnë për lokalizimin e tyre dhe nxjerrjen në një vend të sigurt.
Përditësime
Policia e Shtetit ka njoftuar se numri i turistëve gjermanë të bllokuar në malin e Çikës është 5. Pas verifikimeve të fundit nga autoritetet vendore, ekipet e kërkim-shpëtimit kanë zgjeruar operacionin për gjetjen e tyre.