Dy turistë gjermanë kanë humbur kontaktet me guidën e tyre gjatë një ekspedite në zonën malore të Polisit, në Bashkinë e Librazhdit. Humbja e kontakteve është regjistruar prej rreth 48 orësh, çka ka vënë në lëvizje strukturat përkatëse të sigurisë.
Sipas njoftimeve zyrtare, Policia e Elbasanit ka organizuar një operacion kërkimi në terren, në të cilin janë përfshirë forca të policisë, ekipe të emergjencave civile dhe banorë të zonës, të cilët kanë njohuri të mira për terrenin e thyer të Malësisë së Polisit.
Vështirësitë kryesore në këtë operacion lidhen me konfiguracionin e vështirë gjeografik të zonës, mungesën e sinjalit të telefonisë celulare dhe mungesën e gjurmëve nga pajisjet GPS që turistët mund të kenë pasur me vete. Deri në këtë moment, nuk është arritur të vendoset asnjë lidhje me personat në fjalë. Autoritetet vijojnë kërkimet me intensitet, ndërsa orët në vijim vlerësohen si vendimtare për gjetjen e tyre dhe zbardhjen e rrethanave të ngjarjes.
Përditësime
Autoritetet kanë zgjeruar operacionin e kërkimit pasi konfirmuan zhdukjen e një guide lokale, përkrah dy turistëve gjermanë. Forcat e Policisë së Shtetit dhe banorë të zonës po krehin terrenin malor në Librazhd për gjetjen e tre personave.
Dy turistët gjermanë, të cilët ishin shpallur të humbur në Librazhd, u gjetën shëndoshë e mirë në fshatin Stavraj. Zhdukja e tyre ishte pasojë e një defekti teknik në automjet, të cilin e braktisën në vendngjarje. Turistët janë transportuar drejt Përmetit, ku do t'i bashkohen grupit të tyre të guidës.
Autoritetet lokalizuan dy turistë gjermanë pas 15 orësh kërkimesh në fshatin Gaferr, Njësia Administrative Stravaj, Bashkia Prrenjas. Operacioni u finalizua me sukses falë përdorimit të dronëve dhe ndihmës së shërbimit pyjor. Sipas grupit të hetimit, shkak për humbjen u bë orientimi i gabuar në terren, duke hedhur poshtë pretendimet për defekte mekanike në automjet. Policia e Shtetit sqaroi se turistët nuk kanë qenë në Përmet dhe mohoi raportimet për zhdukjen e ndonjë guide lokale.