Shërbimet e Policisë së Shtetit finalizuan me sukses një operacion kërkim-shpëtimi për dy turiste holandeze, të cilat hasën vështirësi gjatë eksplorimit të natyrës në fshatin Pëllumbas të Tiranës.
Ndërhyrja nisi pas njoftimit se dy shtetaset kishin mbetur të bllokuara në terrenin e vështirë përreth Shpellës së Pëllumbasit, si pasojë e një rrëzimi që i shkaktoi njërës prej tyre dëmtim në këmbë. Në aksion morën pjesë forcat e Komisariatit të Policisë Nr. 1, në bashkëpunim me Policinë Alpine të Forcës Kombëtare të Sigurisë, Njësia Tiranë.
Pas lokalizimit, efektivët ofruan ndihmën e parë për të lënduarën, e cila më pas u transportua në Spitalin e Traumës për trajtim mjekësor. Turistja tjetër u shoqërua nga shërbimet policore drejt një zone të sigurt.
Shtetaset holandeze shprehën mirënjohjen ndaj strukturave të policisë për reagimin e shpejtë dhe profesionalizmin e treguar gjatë operacionit. Policia e Shtetit rikujtoi se qytetarët dhe turistët mund të kërkojnë ndihmë në raste emergjence duke telefonuar në numrin pa pagesë 112.
Përditësime
Policia e Shtetit, në bashkëpunim me shërbimin e Ambulancës, mundësoi transportimin e turistes së dëmtuar drejt Spitalit të Traumës në Tiranë për trajtim të specializuar.
Ministri i Punëve të Brendshme, Besfort Lamallari, vlerësoi sot profesionalizmin dhe guximin e efektivëve të policisë gjatë operacionit të shpëtimit të dy turisteve holandeze në Shpellën e Pëllumbasit. Ministria konfirmoi se ndërhyrja e shpejtë dhe e koordinuar mundësoi nxjerrjen e tyre në kohë, duke shmangur pasojat për jetën.