Dy turistë nga Belgjika u shpëtuan nga autoritetet pas mbetjes së bllokuar në zonën e Qafës së Valbonës, në Alpet e Valbonës. Rreth orës 14:00 të 10 prillit 2026, u mor sinjalizimi se turistët, të cilët po eksploronin zonën, nuk mund të vazhduonin lëvizjen për shkak të kushteve të vështira të terrenit malor dhe dëborës.
Menjëherë pas njoftimit, shërbimet e Komisariatit të Policisë Tropojë, në bashkëpunim me ekipin e kërkim-shpëtimit të Valbonës, nisën operacionin e kërkimit. Pas disa orësh kërkimesh intensive në këmbë, forcat policore dhe ekipi i shpëtimit i lokalizuan turistët në Qafën e Valbonës dhe u ofruan ndihmën e nevojshme.
Turistët ndodhen në gjendje të mirë shëndetësore dhe u akomoduan në një bujtinë në Valbonë. Ata falënderuan shërbimet e policisë dhe ekipin e shpëtimit për reagimin e shpejtë dhe profesional.
Drejtoria Vendore e Policisë Kukës fton qytetarët të telefonojnë në numrin pa pagesë 112 për çdo rast nevoje për ndihmë.